Son xəbərlər
11 DEKABR
10 DEKABR
07 DEKABR
MƏDƏNİYYƏT

Nəsimi Festivalında şəhər peyzajlarının kreativ incəsənəti təqdim olunacaq

<b>Nəsimi Festivalında şəhər peyzajlarının kreativ incəsənəti təqdim olunacaq</b>

27-30 sentyabr tarixlərində Azərbaycanda ilk dəfə olaraq Nəsimi - şeir, sənət və mənəviyyat Festivalı keçiriləcək

Şərqin dahi şair və mütəfəkkirlərindən biri İmadəddin Nəsiminin (1369-1417) yaradıcılığına həsr olunan, şeir və sənətin yaşadılması məqsədi daşıyan festival Heydər Əliyev Fondunun təşkilatçılığı və Mədəniyyət Nazirliyinin dəstəyi ilə reallaşır.
Festivalın proqramı parlaq və maraqlı layihələrlə zəngindir.
Şəhər peyzajlarının kreativ incəsənəti layihənin parlaq hadisələrindən biri olacaq.
Sentyabrın 30-da isə Bakının Qala qəsəbəsində istifadəsiz qalan sənaye anbarında “Açılan divar” ictimai incəsənət layihəsinin təqdimatı olacaq. Layihədə 10-adək yerli və xarici “urban art” (şəhər mühitində incəsənət) rəssamı iştirak edəcək, binanın divarları üzərində öz əsərlərini yaradacaqlar. Bunların arasında ABŞ, Cənubi Afrika, Braziliya, Belçika, İspaniya və Fransa rəssamları olacaq.
Uşaq və yeniyetmələr əsərlərin yaradılması prosesini yaxından müşahidə edib, ustad rəssamların rəhbərliyi ilə rəsmlər çəkəcəklər. Azərbaycan Dövlət Rəssamlıq Akademiyasının tələbələri daha sonra həmin eskizləri binanın divarlarında böyük ölçüdə əks etdirəcəklər.
Tanınmış rəssamlar Ron Hendriks (Cənubi Afrika) və Filip Bodelok (Fransa) festivalda təqdim olunacaq əsərlər və təəssüratları barədə Trend-ə danışıblar. Maraqlıdır ki, rəssamlar öz əsərlərinə ad vermirlər, bununla da festivalın qonaqlarına urban-art ustalarının fikrini tamamlamaq imkanını yaradırlar.
Urban-art şəhər məkanına, həyatına və mədəniyyətinə aid incəsənət növüdür. Urban-art üslubunda şəhər peyzajlarına xüsusi məhəbbət bəsləyən bir çox müasir rəssam, dizayner və hətta rejissor işləyir. Şəhər heç də ruhu ovsunlayan təbiət gözəlliyi, tarixi məkanlar və landşaftdan az cəzb etmir. Çox vaxt urban-art özündə strit-art və qrafiti elementlərini əks etdirir, bununla da bizi şəhər arxitekturası və şəhər üslübunun tematikası ilə ilhamlandıraraq bir çox vizual incəsənət formalarını ümumiləşdirir.
Ron Hendriks bildirib: “Mən bütün dünyanı səyahət etmişdim, ancaq Azərbaycanda heç vaxt olmamışdım. Bu, fantastik bir ölkədir və burada olmaq mənə xoşdur. Bakı gözəl şəhərdir, burada məni gözəl qarşılayan mehriban insanlar yaşayır”.
Rəssam küçə incəsənəti ilə artıq 15 ildir ki məşğuldur və əsəri yaradarkən mandal - dini mahiyyətdə olan sxematik təsvir ideyasını həyata keçirmək qərarına gəlib. Mandal sanskrit dilindən tərcümədə ənənəvi fiqurlar vasitəsi ilə kainat modelini ötürən dairə və yaxud disk deməkdir. Yəni, əslində, bu, “kainat xəritəsi” kimi təqdim olunan mürəkkəb həndəsi rəsm və ya konstruksiyadır.
“İşlərin yaradılmasında məni əhatə edən material və əşyalardan istifadə edirəm, əsərləri kreativ formada təsəvvür etməyə çalışaraq, onları öz yaradıcılığıma adaptasiya edirəm. Mən mandal dairəsi - müqəddəslik və ekzistensializm obrazını təsvir etmək qərarına gəldim. Həyatımızda mandal dairəsinə müxtəlif formalarda rast gələ bilərik. Məsələn, günəş və ayı biz dairə formasında görürük. Əhatəmizdən danışsaq, ailə dairəsi, dostlar dairəsi də var. Mənim anlayışımda, mandal dairəsi "həyat" deməkdir. Mən mandal dairəsini tez-tez təsadüf edilən həndəsi elementlər və rənglər – qırmızı, sarı, göy, ağ və qara ilə birləşdirmişəm. Qırmızı rəng enerji rəmzidir, göy – şəfa, sarı – xoşbəxtlik, qara – daxili konsentrasiya, ağ – sülh. Bütün bu rənglər mənim işimdə uzlaşır və Nəsiminin fəlsəfi əsərlərindən ilhamlanıb. Onun yaradıcılığı ilə Azərbaycana gəlməzdən öncə tanış olmamışam və şəxsi mövzularımın onun əsərlərinin ideyaları ilə necə uyğun gələ biləcəyini aydınlaşdırmaq üçün araşdırma aparmalı idim. Nəsiminin yaradıcılığının dərk etməyim bu əsərin yaranmasına gətirib çıxardı”, - deyə rəssam əlavə edib.
Filip Bodelok da həmçinin Bakıya ilk dəfə gəlib və tikintinin gedişatı və memarlığa valeh olub.
Rəssam bildirib: “Mən bir çox şəhərdə olmuşam, Bakı öz orijinallığı ilə yadda qalacaq, burada şərq koloriti ilə qərb modernizmi uğurla uyğunlaşır. Mənə, divarlarda şəkil çəkən bir insan kimi, şəhər çox xoşuma gəldi. Öz təsəvvürümdə sizin meqapolisinizin divarlarında həyata keçirə biləcəyim süjetər çəkirdim”.
Filip Bodelok artıq 10 ildir ki sevdiyi işlə məşğul olur. Maraqlıdır ki, o təklikdə, dünyanın yaranışı və onun əsərlərində əks olunması haqqında fikirlərə dalaraq işləməyi sevir. Fransadan gələn qonaq 7x31 metr ölçülərində əsər üzərində çalışır və həndəsi naxışları birləşdirərək orada panter və ceyran çəkib.
“Nəsiminin yaradıcılığı mənim üçün mənəviyyat təcəssümü və insanın imkanlarının genişliyi deməkdir. Mənim fikirlərim bir çox hallarda onun insanlar, heyvanlar və insanlar, bitkilər və minerallar arasında üzvi əlaqə fəlsəfəsi ilə üst-üstə düşür. Bu, mənim üçün - bir incəsənət adamı üçün çox vacibdir və bütün bunlar kainatla, onun mənəvi aləmi ilə əlaqəlidir. Mən tez-tez rəsmlərimdə heyvanları təsvir edirəm, ancaq bu sadəcə heyvanlar deyil. Onlar heyvanlar aləminin arxetipləridir. Və bu rəsmlərdə mən çoxtərəfliliyi sərhədsiz şəkildə göstərməyə çalışıram. Mənim üçün rəsmdə milliyyət məsələsi yoxdur, bu, azərbaycanlı və yaxud fransız rəsmi deyil. Bu rəsmlərdə mən həyatı göstərməyə çalışıram. Bu rəsmdə mən panteri əks etdirdim, daha sonra həndəsi naxışlar və ceyranı. Bütün bu üç rəsm öz aralarında nazik xətlərlə əlaqəlidir. Bu da makro və mikrodünyaların əlaqəsi deməkdir”, - deyə Bodelok bildirib.
Qeyd edək ki, ilk dəfə olaraq bu cür möhtəşəm festival tamaşaçılar üçün bilet və dəvətnamələrlə yox, yalnız www.nasimifestival.live rəsmi saytında qeydiyyatdan keçməklə baş tutacaq. Bu saytda layihə barədə daha ətraflı öyrənmək olar. Ona görə də saytda qeydiyyatdan keçmək lazımdır, bu, həm də tədbirlərə giriş bileti olacaq.
Festival şairin fəlsəfi baxışlarını əks etdirən “Simadan – asimana” və onun öz kəlamından götürülən “Zərrə mənəm, günəş mənəm…” şüarları ilə keçiriləcək. Genişmiqyaslı tədbirin proqramı müxtəlif sənət növləri və bilik sahələrini əhatə edir. Festival günlərində Bakı şəhərinin müxtəlif məkanlarında, eləcə də Nəsiminin doğma diyarı Şamaxıda proqramlar təşkil olunacaq.









FOTOSLAYD

ƏDƏBİYYAT
GÜNDƏM
Güney Azərbaycan
TRİBUNA
Arxiv