- 10 İyul 2025
Azərbaycan Respublikasının Tranzit Yükdaşımalar üzrə Koordinasiya Şurasının cari fəaliyyətinin təşkili həmin Koordinasiya Şurasının Katibliyi tərəfindən həyata keçiriləcək.
Bu, Prezident İlham Əliyevin bu gün imzaladığı fərmanla “Azərbaycan Respublikasının Tranzit Yükdaşımalar üzrə Koordinasiya Şurasının yaradılması haqqında” fərmana edilən dəyişiklikdə əksini tapıb.
Koordinasiya Şurasının Katibliyinin tərkibinin formalaşdırılmasını və fəaliyyətinin təşkil edilməsini Nəqliyyat, Rabitə və Yüksək Texnologiyalar Nazirliyi həyata keçirəcək. Tranzit yükdaşımalar üzrə marşrut istiqamətləri, onların texnoloji sxemləri, tariflər və tranzit yükdaşımalarla bağlı digər məlumatları Azərbaycan Respublikası Tarif (qiymət) Şurasının Katibliyi deyil, Koordinasiya Şurasının Katibliyi Koordinasiya Şurasının rəsmi internet saytında yerləşdirəcək.
İndiyə qədər Azərbaycan Respublikasının Tranzit Yükdaşımalar üzrə Koordinasiya Şurasının cari fəaliyyətinin təşkili Azərbaycan Respublikasının Tarif (qiymət) Şurasının Katibliyi tərəfindən həyata keçirilib.
Qeyd edək ki, Azərbaycan Respublikasının Tranzit Yükdaşımalar üzrə Koordinasiya Şurası Prezident İlham Əliyevin 21 oktyabr 2015-ci il tarixli fərmanı ilə yaradılıb.
