Son dəqiqə
- 24 Noyabr 2024
Azərbaycan 2022-ci ildə Avropa və Türkiyəyə qaz ixracını 16 mlrd. kubmetrə qədər artırmağı planlaşdırır.
Rusiya mətbuatının verdiyi məlumata görə, bu barədə Azərbaycanın energetika naziri Pərviz Şahbazov "Rusiya Enerji Həftəsi" çərçivəsində jurnalistlərə bildirib.
Onun sözlərinə görə, Cənub Qaz Dəhlizi çərçivəsində ildə 16 mlrd. kubmetr qazın nəqli nəzərdə tutulub və bu göstəriciyə gələn il çıxması nəzərdə tutulub. Bu əməliyyatlar çərçivəsinə Türkiyəyə ildə 6 mlrd. kubmetr, Avropaya isə 10 mlrd. kubmetr qazın nəqli nəzərdə tutulub.
Energetika naziri bildirib ki, Azərbaycan 2023-cü ildən Türkiyəyə 3,5 mlrd. kubmetr həcmində ("Şahdəniz" qaz-kondensat yatağının işlənməsinin birinci mərhələsi çərçivəsində – red.) əlavə qaz tədarükü barədə razılıq da əldə edilib.
Xatırladaq ki, "Şahdəniz-1" layihəsi çərçivəsində qazın nəqli üzrə müqavilə 2001-ci ildə əldə edilib və onun müddəti bu ilin aprelin 16-da bitib. Müqavilənin müddətinin bitməsindən sonra "Şahdəniz-1" çərçivəsində Azərbaycandan Türkiyəyə qazın nəqli dayandırılmışdı. Lakın sonradan tərəflər müqavilənin 3 il müddətinə, yəni 2024-cü ilin sonunadək uzadılması barəsində razılığa gəldilər. Yeni müqavilə ilə Türkiyəyə ildə 3,5 mlrd. kubmetr qaz (bundan əvvəl 6,6 mlrd. kubmetr idi - red.) çatdırılacaq.
Əlavə etmək lazımdır ki, ötən ilin dekabrın 31-də Azərbaycan Cənub Qaz Dəhlizinin tərkib hissəsi olan Trans-Adriatik kəməri (TAP) vasitəsi ilə Avropaya qazın ixracına başlayıb. Bu boru kəməri Yunanıstan, Albaniya və Adriatik dənizindən keçməklə İtaliyanın cənubuna qədər uzanır. Kəmərin potensialı onun ötürücülük gücünü iki dəfə artıraraq, ildə 20 mlrd. kubmetrə çatdırmağa imkan verir.
Qeyd edək ki, Cənub Qaz Dəhlizinə Cənubi Qafqaz, Trans-Anadolu və TAP qaz kəmərləri daxildir.
