Son dəqiqə
- 31 Avqust 2025
“Azərbaycanın Qarabağ bölgəsində yaşayan erməni sakinlər ilə təmaslar üzrə məsul şəxs Ramin Məmmədovun martın 1-də Rusiya sülhməramlı kontingentinin qərargahında ölkəmizin Qarabağ bölgəsində yaşayan erməni sakinlərin təmsilçiləri ilə keçirdiyi görüş onu göstərir ki, Azərbaycan tədricən öz istəklərinə nail olur”.
Politoloq İlqar Vəlizadə belə deyib.
O bildirib ki, Qarabağda hələ də təhlükəsizlik tam təmin olunmayıb: “Buna baxmayaraq, dialoq təmin edilib. Azərbaycan Laçın yolunda nəzarəti gücləndirir. Həmçinin terrorçu Ruben Vardanyan artıq Qarabağdan qovulub. Bütün bunlar onu göstərir ki, rəsmi Bakı öz məqsədləri uğrunda inamla irəliləyir. Bizim əsas istəyimiz ondan ibarətdir ki, prosesə mane olan qüvvələr müqavimətin mənasız olduğunu başa düşsünlər. Əgər müqavimət davam edərsə, Azərbaycan adekvat tədbirlər görə bilər”.
Siyasi icmalçının sözlərinə görə, baş verən proseslər Laçın yolu mövzusundan sui-istifadə edərək Azərbaycana qarşı aparılan kampaniyaların iflasa uğradığını göstərir: “İndi bizim əsas məqsədimiz Laçın yolunda nəzarət-keçid məntəqəsinin yaradılmasıdır. Kimsə buna mane ola bilməz. Rusiya xarici işlər naziri Sergey Lavrov fevralın 28-də Bakıda bəyan edib ki, bu, üçtərəfli sənədlərdə qeyd olunmayıb. Bunu biz də bilirik. Əgər Lavrov üçtərəfli sənədə istinad edirsə, söyləməliyik ki, orada Zəngəzur dəhlizinin statusu da konkret olaraq göstərilməyib. Həmçinin sənədlərdə erməni terrorçularının Qarabağdan çıxarılmasının vacibliyi barədə müddəa var. Rusiya sənədlərdəki tələblərin icrasında maraqlıdırsa, Ermənistandan bunu tələb etməlidir. Yəni Moskva öhdəlikləri öz istədiyi kimi qiymətləndirirsə, bunu biz də edə bilərik”.
Analitikin sözlərinə görə, Azərbaycanın Qarabağ bölgəsində yaşayan erməni sakinlər ilə növbəti görüşlər Bakıda, Ağdamda, Gəncədə də keçirilə bilər: “Bizim üçün utopik nəsə yoxdur. Vətən müharibəsi göstərdi ki, hadisələrin inkişaf istiqamətlərini biz müəyyənləşdiririk. Azərbaycanın həyata keçirdiyi güclü diplomatiya bütün məqsədlərimizin reallaşmasına imkan verir. Üç il əvvələ kimi bəziləri deyirdilər ki, Azərbaycan Şuşanı azad edə bilməz. Lakin biz bunu bacardıq. Yəni Qarabağdakı ermənilər tez-gec Azərbaycanın vətəndaşlığını qəbul edəndən sonra görüşlər paytaxt Bakıda da keçirilə bilər. Ümumiyyətlə, bu təmaslar davam etməlidir. Biz hələ prosesin astanasındayıq”.
Siyasi şərhçi Elçin Mirzəbətli isə hesab edir ki, Milli Məclisin deputatı Ramin Məmmədov və digər səlahiyyətli şəxslərin Azərbaycanın Qarabağ bölgəsinin erməni sakinləri ilə görüşü müsbət addımdır və bu prosesin rəsmi Bakının yol xəritəsinə uyğun şəkildə inkişaf etməsindən xəbər verir: “Qeyd edim ki, Prezident İlham Əliyev Münhen Təhlükəsizlik Konfransında normallaşma prosesinin iki istiqamət üzrə inkişaf etdiyini vurğulamışdı, qeyd etmişdi ki, Ruben Vardanyan Rusiya sülhməramlılarının müvəqqəti yerləşdiyi ərazini tərk etdikdən sonra orada yaşayan və öz vətəndaşlarımız olan erməni sakinlərlə təmaslara başlanacaq. Ruben Vardanyanın pozucu, təxribatçı fəaliyyətinə Azərbaycanın tələbinə əsasən son qoyulması, eləcə də ölkəmizin erməni kökənli əhalisinin təmsilçiləri keçirilən görüş normallaşma prosesinin hansısa xarici dairələrin sifarişi ilə deyil, dövlətimizin başçısının iradəsinə və prioritet hesab etdiyi prinsiplərə uyuğu olaraq gerçəkləşdirildiyini təsdiqləyir.
Xatırladım ki, görüşdən oncə, təxminən fevralın 26-dan başlayaraq, Ermənistandakı revanşçı dairələrin nəzarətində olan media resursları, eləcə də bölgədə maraqları olan xarici qüvvələrin sosial şəbəkədəki təbliğatçı-təxribatçıları artıq belə bir görüşün keçirildiyi barədə məlumatlar yayır, prosesin ətrafında neqativ, qıcıqlandırıcı fon yaratmaqla Azərbaycanın erməni sakinləri ilə rəsmi Bakının müəyyən etdiyi daxil gündəlik əsasında təmasların qurulmasına maneə yaratmağa cəhd göstərirdilər.
Amma Azərbaycanın prinsipial mövqeyi pozucu qüvvələrin neytrallaşdırılması və erməni sakinlərin Azərbaycan cəmiyyətinə reinteqrasiya olunmaları üçün müzakirələrin başlanılmasına zəmin yaratdı. Növbəti görüşlərin Azərbaycanın digər ərazilərində, Bakıda, Gəncədə, Ağdam da keçiriləcəyi ilə bağlı məlumatlar da prosesin rəsmi Bakının müəyyənləşdirdiyi istiqamət üzrə inkişaf etdiriləcəyini söyləməyə əsas verir.
Erməni sakinlərin Azərbaycan Konstutusiyasının prinsiplərinə uyğun olaraq, cəmiyyətimizə inteqrasiya etmələri barədə müzakirələri Rusiyanın xarici işlər nazirinin ölkəmizə səfəri ilə əlaqələndirənlər isə, proses ətrafında netativ aura yaratmaq istəyənlər, Azərbaycanın daxil gündəmində olan məsələləri geosiyasi qütblərin kontektində təqdim etməklə, bundan faydalanmağı arzulayanlardır”.
Xatıraladaq ki, martın 1-də Milli Məclisin deputatı Ramin Məmmədov Xocalı şəhərində, Azərbaycan Respublikası ərazisində müvəqqəti yerləşdirilmiş Rusiya Federasiyası sülhməramlı kontingentinin qərargahında Azərbaycan Respublikasının Qarabağ bölgəsində yaşayan erməni sakinlərin təmsilçiləri ilə görüşüb. Görüşdə Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət təbii sərvətlərin qanunsuz istismarını araşdıran monitorinq qrupunun rəhbəri Məsim Məmmədov də iştirak edib.
Görüş zamanı Azərbaycan Respublikasının Konstitusiyasına və qanunlarına uyğun olaraq Qarabağ bölgəsində yaşayan erməni sakinlərin Azərbaycan Respublikasına reinteqrasiyasına dair ilkin müzakirələr aparılıb.
Azərbaycan Respublikasının Qarabağ bölgəsində yaşayan erməni sakinlər ilə təmaslar davam etdiriləcək.
