- 20 Aprel 2026
Bir məktəbin qapısına yönələn təhdid yalnız bir binaya deyil, gələcəyə, məsumluğa, ictimai sabitliyə və millətin sabahına yönəlmiş açıq bir hücumdur.
Uşaqların təhsil aldığı məkanlara qarşı hər cür zorakılıq cəhdi qorxu mühiti yaratmağa yönəlmiş alçaq bir əməldir.
Bunun adı sadə bir asayiş məsələsi deyil. Bunun adı vicdansızlıqdır, insanlıq düşmənliyidir, cəmiyyətə gözdağı verməkdir.
Bu gün artıq çox açıq bir həqiqəti yüksək səslə deməliyik: Məktəblərin təhlükəsizliyi yalnız təhsil məsələsi deyil, milli təhlükəsizlik məsələsidir.
Çünki məktəb övladlarımızın əmanət edildiyi yerdir. Ana-atanın duası, müəllimin zəhməti, dövlətin ümidi oradadır.
Bir məktəbin qarşısında baş verən ən kiçik təhdid belə bütün cəmiyyətin ürəyinə toxunur. Çünki mövzu uşaqlardırsa, heç bir acı kiçildilə bilməz.
Son illərdə xüsusilə Amerika Birləşmiş Ştatlarında məktəb hücumları ilə bağlı çoxsayda acı mənzərə gördük.
Televiziya ekranlarına yansıyan görüntülər, siniflərdən yüksələn qışqırıqlar, məktəb həyətlərindəki panika, ailələrin fəryadı hələ də yaddaşlardadır.
Orada baş verən faciələr yalnız bir ölkənin daxili məsələsi kimi qəbul edilməməlidir. Bunlar dünyaya verilmiş sərt xəbərdarlıqlardır.
İndi hamımızın birlikdə verməli olduğu sual budur: Eyni vəhşət anlayışının Türkiyədə kök salmasına göz yumacağıqmı, yoxsa elə ən başından tədbirləri yüksək səviyyəyə qaldıracağıqmı?
Türkiyə uşaqlarını qorumaq məcburiyyətindədir. Həm də sözlə deyil, real tədbirlərlə. Bu baxımdan məktəblərin qarşısında polis qüvvələrinin və ehtiyac olan bölgələrdə jandarmanın daha diqqətli və görünən şəkildə xidmət aparması artıq seçim deyil, zərurətdir.
Xüsusilə giriş-çıxış saatlarında təhlükəsizlik tədbirləri artırılmalı, riskli bölgələrdə növbətçilik sistemi gücləndirilməlidir. Məktəb ətrafı kameralarla, yoxlamalarla, şübhəli şəxslərin izlənməsi və operativ müdaxilə sistemləri ilə təmin olunmalıdır.
Bəzən ən böyük qoruma caydırıcılıqdır. Pis niyyətli bir şəxs dövlətin qətiyyətli duruşunu məktəb qapısında hiss etməlidir.
Ancaq təkcə təhlükəsizlik qüvvələrinin mövcudluğu kifayət etmir. Bu məsələ ümumxalq şüuru məsələsidir. Hər kəs öz məktəbinə, öz övladına, öz məhəlləsinə, öz küçəsinə sahib çıxmalıdır. “Mənə toxunmayan ilan min il yaşasın” düşüncəsinin burada yeri yoxdur. Hansı uşağın başına gəlirsə gəlsin, o acı hamımızın canını yandırar.
O övlad bizim övladımızdır. Çünki uşaqların qorxduğu bir cəmiyyətdə heç kim gerçəkdən güvəndə deyil.
Məhəllə mədəniyyəti yenidən dirçəldilməlidir. Şübhəli hal görən valideyn susmamalıdır.
Müəllim, psixoloji xidmət (rehberlik) bölməsi, məktəb rəhbərliyi, bələdiyyə nümayəndəsi (muxtar), polis, ailələr və çevrə esnafı birlikdə ortaq təhlükəsizlik şəbəkəsi yaratmalıdır. Naməlum bir avtomobil günlərlə məktəb qarşısında dayanırsa, bu önəmlidir.
Məktəb ətrafında narahatlıq yaradan şəxslər görünürsə, bu önəmlidir. Sosial mediada edilən təhdid dolu paylaşımlar önəmlidir. Uşaqların davranışlarında qəfil dəyişikliklər önəmlidir.
n kiçik detal belə önəmlidir. Çünki bəzən böyük faciələr vaxtında ciddi qəbul edilməyən kiçik işarətlərdən sonra baş verir.
Bu məsələdə dövlətin yanında durmaq siyasətdən üstün bir məsuliyyətdir. Dövlət güclü olmalıdır ki, millət rahat yaşasın. Təhlükəsizlik güclü olmalıdır ki, ana rahat yatsın.
Məktəb təhlükəsiz olmalıdır ki, uşaq sabaha ümidlə addımlasın. Burada heç kimin ideoloji hesab aparmaq, məsələni yumşaltmaq və ya səhlənkarlığı normallaşdırmaq lüksü yoxdur.
Söhbət uşaqlardan gedirsə, hamının ortaq dili tədbir, ortaq vicdanı mərhəmət, ortaq mövqeyi isə qətiyyət olmalıdır.
Unudulmamalıdır ki, məktəb yalnız dərs keçirilən yer deyil, bir millətin xarakterinin inşa edildiyi məkandır.
Siniflərdə yalnız riyaziyyat, tarix, təbiət elmləri öyrədilmir, orada ümid böyüyür, əxlaq formalaşır, gələcək qurulur.
Məktəbə uzanan çirkli əl buna görə yalnız bu günü deyil, sabahı da hədəf alır. Bu səbəbdən məktəbə hücum millətə hücumdur. Uşağa yönələn təhdid insanlığa yönələn təhdiddir.
Bizim mədəniyyətimiz uşaq üzərinə titrəyən bir mədəniyyətdir. Bizdə uşağın göz yaşı dünyanın ən ağır yüküdür.
Heç bir ananın qəlbinə qorxu düşməsin, heç bir atanın əli çarəsizliklə titrəməsin, heç bir uşaq məktəb yolunda narahatlıqla yerimək məcburiyyətində qalmasın deyə hamımız daha diqqətli, daha həssas və daha qətiyyətli olmalıyıq.
Bu gün sussaq, sabah çox gec ola bilər. Bu gün tədbir görməsək, sabah peşmanlıq fayda verməz.
Ona görə çağırışımız aydındır: Məktəblərin önü nəzarətsiz qalmamalı, təhlükəsizlik boşluğu yaranmamalı, polis və jandarma lazım olan yerlərdə aktiv və görünən şəkildə xidmət aparmalıdır.
Ailələr diqqətli olmalı, müəllimlər həssas olmalı, məhəllə sahib çıxmalı, dövlət qətiyyətli mövqe sərgiləməlidir.
Çünki uşaqlar bu ölkənin əmanəti, məktəblər isə o əmanətin yuvasıdır.
Allah övladlarımızı, müəllimlərimizi və bütün millətimizi hər cür bəladan qorusun. Hansı uşaq olursa olsun, onun canı bizim canımızdır. Və unutmayaq: Bir uşağın təhlükəsizliyi bir millətin namusudur.
Serkan Torun
